Од вкупниот број на електроцентрали во Република Северна Македонија, 256 користат обновливи извори на енергија за производство на електрична енергија, од нив 197 електроцентрали користат повластена тарифа, додека преостанатите 59 електроцентрали не користат мерки за поддршка за производство на електрична енергија.

Целокупната електрична енергија произведена од ветерната електроцентрала, термоелектроцентралите на биогас и термоелектроцентралата на биомаса се откупува од страна на операторот на пазарот на електрична енергија по повластени тарифи. Од вкупниот број на мали хидроелектроцентрали, 90 ја продаваат произведената електрична енергија по повластени тарифи, додека преостанатите 11 електроцентрали ја продаваат произведената електрична енергија на пазарот на електрична енергија. Како и кај малите хидроелектроцентрали и кај фотонапонските електроцентрали доминира бројот на повластени производители. Имено, 102 фотонапонски електроцентрали користат повластена тарифа, додека преостанатите 38 фотонапонски електроцентрали произведената електрична енергија ја продаваат на пазарот на електрична енергија. Имајќи предвид дека големите хидроелектроцентрали не го исполнуваат условот да имаат инсталирана моќност помала од 10 MW за стекнување на статус на повластен производител, тие целото свое производство го пласираат на пазарот на електрична енергија.

И покрај фактот што 97 % од вкупниот број електроцентрали за производство на електрична енергија користат обновливи извори на енергија или изразено во апсолутни бројки, 256 од 264 електроцентрали користат обновливи извори на енергија, нивното процентуално учество во вкупната инсталирана моќност изнесува 36,71 %. Учеството на обновливата енергија во вкупното произведената електрична енергија од домашни производители е уште помало и изнесува 24,19 %.

Учеството на повластените производители кои користат повластени тарифи во вкупно инсталираниот капацитет од обновливи извори на енергија изнесува 18,35 %, додека во вкупно инсталираниот капацитет во Република Северна Македонија изнесува 6,73 %. Повластените производители кои користат повластени тарифи учествуваат со 6,17 % во произведената електрична енергија од домашни производители, додека во делот на производството од обновливите извори повластените производители учествуваат со 25 %.

 

МЕРКИ ЗА ПОДДРШКА НА ОБНОВЛИВИ ИЗВОРИ НА ЕНЕРГИЈА           

Мерките за поддршка на производството на електрична енергија од обновливи извори на енергија имаат за цел да обезбедат поттикнување на инвестиции за оптимално искористување на расположливиот потенцијал на обновливите извори на енергија во Република Северна Македонија, постигнување на националните задолжителни цели за учество на обновливите извори на енергија во вкупната потрошувачка на енергија и услови за заштита на животната средина и ублажување на климатските промени.

Повластената тарифа како мерка за поддршка на производството на електрична енергија од обновливи извори на енергија е воведена во 2007 година, додека првите електроцентрали кои произведената електрична енергија ја продаваат по повластени тарифи започнуваат со работа во 2010 година. Со Законот за енергетика*, од 2018 година покрај повластената тарифа, се воведува и премијата како мерка за поддршка.